صفحة جديدة

صفحة جديدة
بقلم.. مني أحمد ابراهيم

جربت شعور انك دايما مجروح متساب
طيب جربت الحيرة اللي بتاخدك من بحر الراحة اللي جافاك
وترميك في عذاب
من بعد الكلمة الحلوة اللي ما كانت مرة بتطلع غير م الأحباب
فجأة بتتخاصموا وتتفارقوا
ولا من حقك تعرف ذنبك
ولا يوم تنطق حتى بكلمة لو حتى عتاب
…
طيب جربت ألم انك دايما بتهون
تضحك وتطبطب وتهون وتكون مضمون
في الحزن ينادوا عليك تحضر
وبتكون ليهم مية ضهر وعون
وفي وقت الأفراح ينسوك وكأنك دون
…
ولامتى هتفضل متحمل صدقني حرام
هما يعيشوا وتمام خالص
وانت يا مجروح قلبك ولا لحظة تنام
الدنيا بتوقف ببعادهم
وبتتقطع من مواجعهم
وتبص على أماكن يا ما جمعتكم
وتقول إزاي طيب كله بيطلع أوهام
…
وقف دمعك وامسك قلبك دا حرام تأذيه
واللي مشى وكان بمزاجه وبتبكي عليه
اشطب اسمه وامسح رسمه
وارفع راسك دا انت الغالي
لو كل الكون جه على قلبك
اوعدني انت اللي المرة دي
عمرك أبدا ما هتيجي عليـــــــه