عاطف كبارة.. يكتب
شهيد مولود
مابين صبرك وبين صمتي
سؤال وردود
سنين قهرك وليه صومتي
عن المفروض
يا صابرة برغم أحزانك
وفجرك ف العيون زانك
بنور مفرود
ماكانش سكوتي رعب وخوف
وكاتمة العزة صرخة تطوف
بألف حدود
أنا عايش ومش ميت
أنا موجود
وجوايا حمم بركان
تفجر ليكي ألف طوفان
بنار موقود
وحلمك لو ف وسط غيوم
حيتحرر وعمره ف يوم
ماكان موؤود
خليني ارسم ضحكتك
جوا عيون الأمهات
وسيبيني امسح دمعتك
ع اللي إتأسر واللي مات
وحياة ترابك العفيف
ل ارفع جبينك للسحاب
ونصلي ف القدس الشريف
لربنا العدل الوهاب
تهون روحي يزول جسمي
وأتشرف وييجي ميعاد
بإيدك تكتبي إسمي
ف قلب شهادة الميلاد
شهيد مولود
ياصابرة برغم أحزانك
وفجرك ف العيون زانك
بنور مفرود
أنا عايش ومش ميت
أنا موجود …
عاطف كبارة
