بقلم: شحته سمير
سنة جديدة
وفيها الكل يتمني
في أحلامه يشوفها عام
وانا خيالي
سبق حلمي عمل له مقام
وم الفجرية
قامت روحي قبل إيدَيَّه
تتوضي وتترجي من الرحمن
شُعاع الصبر والإيمان
بلون الشمس في الصُبحِيه
بِيَملي الدُووُر دفي وسرور
في عز البرد
يبعت ورد للمرضي
ويغزل بالأمل فرحة
وينسج من ساعات الأمس
عباية الغد
مِتحَاكَة علي نِيريَّن
عشان تغزل
نسيج الفرح كل يومين
ومهما تختبط بالشوك
لا يُصِيَبها ما يجرح قلب
وَلا يِصَحَّي دموع العين
وِلَوُّ قابض علي جمرة
بعد حَمَارها م الأيام بقت سمرا
ولو راكب حصان من ريح
ولو طالق
عنان قلبك ما بين مجاريح
تلاقي فوارس الكبوات
جريح وطريح
بيشفيهم شعاع الصبر والإيمان
بلون الشمس
بيرتل في كل صلاة
ويتمني لحبايبه حياة
ويتمني لحبايبه حياة
