صبري الحصري.. يكتب
عارف
عارف إمتى بيبقى كلامك
واضح جدا جوة عنيك
لما يكون واقف قدامك
إنسان فعلاً حاسس بيك
عنده مشاعر زى مشاعرك
من نظراتك تلاقيه سامعك
يقرا عينك من غير ألغاز
وانت ف عز سكون الصمت
يسمع صوتك بالإحساس
هى حقيقة بتحصل لكن
مش موجودة ف كل الناس
علشان كده دايما ترتاح
لما تقابل شخص مُعين
تلقى الهم ف لحظة انزاح
والجرح بقى ف قلبك هين
شخص تحس بإنه علاج
لما يكون جنبك ومعاك
بيحس بوجعك جواك
من قبل ما تحكى ولا تبين
فيه حاجات مش بسهولة تبان
ولا تتقال بالشرح وبس
ياما حاجات جوة الانسان
مابتتقالش لكن تتحس
