الطف يارب بعبادك في دي الأيام
الشر زاد والخير تاه وسط الزحام
الناس بتصرخ ومحدش سامعلها كلام
والجنيه أصبح ما بيجيبش شريط برشام
الناس بعد اللحمة ما سعرها قام
بقت بتسال على كيلو رجول الفراخ بكام
ساعات تلاقيها وساعات تقضيها فول والسلام
وبقيت من الجوع والقلق مش عارفه تنام
تحسبها يمين تحسبها شمال في الآخر تقضيها صيام
انظر يارب للمحرومين والغلابة في كل مكان
الفجر زاد والفساد ساد والضمير نام
والغلا هروان طيران من غير لجام
الناس بقت بتشوف اللحمة في الأحلام
وهما بياكلوها ، تمام وآخر انسجام
ويصحى الواحد فيهم على عيش حاف فيتمنى ينام
عشان يحلم تاني ويجيلو كباب في المنام
الجبنة مليانة جير والسجق من الخنزير واللانشون رمام
والتجار يضحكوا ع الناس ويقولولهم نزلنا لكم الاسعار ياكرام
لكن عندنا رجاء وأمل من رب العباد صاحب الدوام
يرفع عننا الغلا والوباء وينبثق النور من الظلام
صبرنا يارب على الأيام قادر تغير الحال في الحال
ودي حقيقة لا فيها فصال ولا كلام
المعادلة صعبة فيها سين وصاد وعين ولام
ارشدنا يارب للحلول دي كلها مجاهيل من غير أرقام
